जनजाति महासंघया चक्काजामं जनजीवन प्रभावित
महासंघया महासचिव सहितयात ज्वनायंकल
न्हूगु संविधानय् आदिवासी जनजातितय् अधिकार सुनिश्चिताया माग यासें नेपाल आदिवासी जनजाति महासंघं देय्न्यंक याःगु चक्काजामं जनजीवन प्रभावित जूगु दु । महासंघया कार्यकर्तातय्सं आइतवाः सुथंनिसें स्वनिगः नापं देय्या थीथी थासय् प्रदर्शन यानाः चक्काजाम याकाच्वंगु दु । स्वनिगःया लँ सुनसान जुयाच्वंगु दुसा थाय् थासय् सुरक्षाकर्मी खटे यानातःगु दु ।
चक्काजामया कारणं देय्न्यंक सवारी साधन ठप्प जुसां छुं छुं थासय् धाःसा मोटरसाइकल चलेजुयाच्वंगु दु । चक्काजामया इलय् गाडी चले याःगु धासें महासंघया कार्यकताय्सं येँ, उदयपुर लगायत थासय् मोटरसाइकलय् तोडफोड यानाब्यूगु दु ।
थ्वहे दथुइ थीथी थासय् तोडफोड याःगु धासें प्रहरीं महासंघया महासचिव लगायत आपालं कार्यकर्तातय्त ज्वना यंकूगु दु । प्रहरीं महासंघया महासचिव आङकाजि शेर्पायात चाबहीलिं ज्वनायंकूगु खः । महासंघं शान्ति पूर्ण प्रदर्शन यानाच्वंपिं थः द्वःछि मल्याक नेता कार्यकर्तातय्त प्रहरीं ज्वनायंकूगु खँ धाःगु दु ।
इलय् हे संविधान निर्माण यायेत व उकी आदिवासी जनजातिय् अधिकार दुथ्याकेत महासंघं लच्छि न्ह्यः निसें दबावमूलक ज्याझ्वः न्ह्याकावयाच्वंगु खः ।
