माओवादीं दम्भ त्वःतूसा जक सहमतिय राजनीति : नेपाल
नेकपा एमालेया वरिष्ठ नेता माधवकुमार नेपालं एकीकृत नेकपा माओवादीं दम्भ त्वःतूसा जक सहमतिया राजनीति न्ह्याः वनेफइ धयादिल ।
प्रॆस चौतारीं मंगलवाः जकपुरय् ग्वसाःग्वःगु पत्रकार सम्मेलनं वयेकलं लोकतान्त्रिक पद्धतियात माओवादीं आत्साथ यायेमफूगु द्वपं बियादिसें दक्वसित सम्मान मब्यूसाः माओवादीनाप सुनां नं सहकार्य यायेमफइगु खँ धयादीगु दु । माओवादीयात सत्ता, बन्दुक व जनमतया दम्भ दुगु खँ न्ह्यथंसें वयेकलं दक्वसित लचकता क्यनाः राष्ट्रहितया निंतिं मिलन बिन्दू मालेमाःगु खँय् बः बियादिल ।
माओवादी सरकारं सम्झौता याइगु तर उकीया कार्यान्वयन मयाइगु अत्यन्त खतरनाक सुरुवात याःगु धासें वयेकलं तराईया सशस्त्र संगठन लगायत मेगु थीथी पक्षनाप याःगु सम्झौता अविलम्व कार्यान्वयन जुइमाः धयादिल ।
अथेहे वयेकलं संविधान निर्माण यायेत दक्व दलया सहकार्य व सहभागिता आवश्यक जूगु धासें निर्धारित ईलय् हे संविधान निर्माण जुइ धयादिल ।
