ग्याँस सिलिण्डर मुयाः माओवादी सभासद् गम्भीर घाःपाः
येँ (सन्ध्या टाइम्स)/जाः थुइगु ग्याँसया शिलिण्डर मुयाः माओवादीया सभासद् रामकुमारी यादव गम्भीर रुपं घाःपाः जूगु दु ।
कोटेश्वरय् थः म्ह्याय्या छेँय् थौं सुथय् ग्याँस ज्वयाच्वन धकाः सिलिण्डर बन्द याःवंगु इलय् उकथं सिलिण्डर मुया वःगु खः। उकी लानाः वय्कः गम्भीर रुपं घाःपाः जूगु दु। छेँजःपिंसं धाः कथं वय्कःया शरीरया यक्व हे ब्व बांमलाक च्याःगु दु ।
सभासद यादवया छ्यनं क्वय् च्वंगु फुक्क हे ब्व च्याःगु खँ धाःगु दु। थुकिं यानाः वय्कः चिन्ताजनक अवस्थाय् थ्यंगु खँ नं धाःगु दु। वय्कःयात न्हापा तिनकुनेया कान्तिपुर अस्पतालय् यंकूगु खःसा अन प्रारम्भिक वासः यानाः वीर अस्पतालय् तये यंकूगु दु ।
वय्कःयात स्वयेत माओवादी अध्यक्ष प्रचण्ड नापं मेमेपिं केन्द्रीय दुजःत थौं सुथय् वीर अस्पताल थ्यंगु दु।
घाःपाः जूम्ह सभासद् यादव संविधानसभाया चुनावय् धनुषा निर्वाचन क्षेत्र नं. ६ पाखें माओवादीया उम्मेदवार कथं निर्वाचित जुया वःम्ह खः ।
