बाखं दबूया बाखं पाठ ज्याझ्वः
येँ (सन्ध्या टाइम्स)/नेपालभाषाया नांजाःपिं निम्ह मिसा बाखं च्वमिपिं सुलोचना मानन्धर व रीना तुलाधर नेपाल प्रज्ञा प्रतिष्ठानया प्राज्ञ जुयादीगु लसताय् बाखं दबूपाखें भिंतुना बिल।बाखं दबूया नायः लक्ष्मण राजवंशीया सभापतित्वय् जूगु छगू ज्याझ्वलय् मू पाहांकथं समालोचक माधवलाल कर्माचार्यं झाःगु खःसा विशिष्ट पाहां कथं दयाराम 'सम्भव' झाःगु खः ।
बाखं दबूया जः राजा शाक्यं लसकुस यानादीगु उगु ज्याझ्वलय् समालोचक नर्मदेश्वर प्रधानं खादा क्वखायेकाः लसकुस यानादीगु खःसा मू पाहां माधवलाल कर्माचार्यं बाखं दबूया ख्वाःपौया स्वंगूगु ल्याः विमोचन यानादीगु खः। बाखं दबूया न्हूगु ल्याखय् नेपालभाषाया ४४ पु बाखं दुथ्यानाच्वंगु दु ।
ज्याझ्वलय् बाखंच्वमिपिं रीना तुलाधर, गोविन्दमान श्रेष्ठ, मीना बज्राचार्य, धुरब मधिकर्मि, केदार सितु, सौरभ शाक्यपिंसं थःथःपिनि बाखं न्यंकादीगु खः ।
उगु ज्याझ्वलय् थःगु नुगःखँ प्वंकुसें रीना तुलाधरं थः प्रज्ञा प्रतिष्ठानया प्राज्ञ जुयागुया श्रय बाखं दबूयात हे वनी धयादिल। अथेहे मूपाहां माधवलाल कर्माचार्यं अन पाठ जूगु बाखंया समीक्षा यासें तताःहाकःगु बाखं च्वयेगु स्वयां चीहाकःगु बाखं च्वःसा पाय्छि जुइ धयादिल। सभानायः लक्ष्मण राजवंशीं बाखं दबू आः न्हूगु पिंढीयात लःल्हायेगु ई जुइ धुंकूगु बिचाः प्वंकादिल ।
