असं बाजंया ग्वाहालि पुचः
येँ (सन्ध्या टाइम्स)/असं बाजं गुथियात ग्वाहालि जुइकथं उगु बाजं गुथियात सुथांलाक न्ह्याकेत भाजु द्रब्यमानसिं तुलाधर (भाइराजा)या अध्यक्षताय् जूगु मुँज्यां असं बाजं गुथि ग्वाहालि पुचः नीस्वनेज्या जुल। पूर्णमान तुलाधरयात ग्वाहालि पुचःया नायः ल्यःगु उगु मुँज्याय् न्वकु ललितकाजी तुलाधर, छ्याञ्जे रविरत्न तुलाधर, दांभरि तारा बीरसिं तुलाधर, लिउ छ्याञ्जे पवित्ररत्न तुलाधर व लिउ दांभरि कथं विद्यासागर तुलाधर ल्यःगु दु ।
दुजलय् शशीरत्न तुलाधर, राजेशकाजी शाक्य, राजेश शाक्य, सुमेष तुलाधर व राजमान तुलाधर च्वनादीगु दु।
गुथिपाखें न्ह्याका वयाच्वंगु दाफा व गुंला बाजंयात अझ ब्यवस्थित व सुचारु रुपं न्ह्याकेत ग्वाहालि जुइकथं नीस्वंगु उगु पुचःया न्हूगु विधान नं पारित याःगु दु। थुगुसी जक ५७ म्ह न्हूपिंसं गुंलाबाजं स्यानाः सहभागी जूगु खः। झिदँ न्ह्यः डा. त्रिरत्न तुलाधरया पालाय् थथे न्हूपिं स्यंगु खःसा १२ म्ह पालाः थाकुलिपिनिगु प्रतिनिधित्व यासें भिंतुना देछानादिल। बाजं गुरु ललितकाजीं उगु पुचः नीस्वनेमाःगु आवश्यकतायात कयाः ध्वाथुइकादिल ।
