कांग्रेसं प्रधानमन्त्रीया उम्मेदवारी लितमकाइगु
नेपाली कांग्रेसं प्रधानमन्त्रीया उम्मेदवारी लितमकायेगु खँ धाःगु दु । कांग्रेसं उम्मेदवारी लितकासाः देय् शुन्यतालय् वनेफइगु खतरा दुगु धासें अज्याःगु स्थिति ब्वलंके मबीत उम्मेदवारी लितमकायेगु खँ धाःगु दु ।
शनिवाः नेकपा (एमाले)या शीर्ष नेतातय्सं सहमतिया निंतिं प्रधानमन्त्रीया उम्मेदवारी लितकायेत याःगु इनापय् कांग्रेसं उकीयात अस्वीकार याःगु खः । निगूलिं दलया शीर्ष नेतातय् उपस्थिति दुगु बैठकय् सहमति मालेत स्वंगू प्रमुख दलया नेतात च्वनेगु निर्णय याःगु खः ।
थ्वस्वयां न्ह्यः थौं हे एमालें संविधानसभाय् दुथ्याःगु चिधंगु दलया नेतातनापया बैठकय् भदौ २ गतेया निर्वाचन लिछ्यायेगु प्रस्ताव तःगु खः । एमालें बहुमतीय सरकारं शान्ति व संविधानया ज्या पूवंकेमफइगुलिं सहमतिय सरकार गठन यायेमाःगु खँ धाःगु खः ।
एमालें सहमति सरकार गठनया निंतिं २गतेया निर्वाचन लिछ्यायेत इनाप यायेगु व अथे मजुसाः चिधंगु दलतय्त उगु निर्वाचनय् तटस्थ च्वनेत इनाप याःगु खः ।
