'कांग्रेस व एमालें संविधानसभायात असफल दयेकेत स्वयाच्वन'
एकीकृत नेकपा (माओवादी)या उपाध्यक्ष डा. बाबुराम भट्टराईं नेपाली कांग्रेस व नेकपा (एमालें) प्रधानमन्त्री ल्ययेगु प्रकृयायात ताःहाक यानाः संविधानसभायात असफल यायेत स्वयाच्वंगु द्वपं बियादीगु दु ।
शनिवाः गोरखाय् माओवादी गोरखा शाखा व नेपाल राष्ट्रिय दलित मुक्तिमोर्चां याःगु ज्याझ्वःलय् भट्टराईं एमाले व मधेशवादी दलत तटस्थ च्वनाः व कांग्रेसं थःगु अडान मत्वःतुगु कारणं देशं न्हूम्ह प्रधानमन्त्री ल्ययेमफुगु धयादिल । वय्कलं कांग्रेस व एमालें थःथःगु अडान कायम यानाः प्रधानमन्त्री ल्ययेगु ज्यायात ताः ई तक न्ह्याकेगु षड्यन्त्र यानाच्वंगु धयादिल ।
नेता भट्टराईं भदौ २ गते नं संसदं न्हूम्ह प्रधानमन्त्री ल्ययेमफुसाः निम्हं उम्मेदवारं मेम्ह मनूया निंतिं लँपू चायेकाः बीमाःगु बिचाः प्वंकादिल । वय्कलं निम्हं उम्मेदवारं थःथःगु नां लितकयाः मंकाः सहमतिलय् प्रधानमन्त्री ल्ययेमाःगु धयादिल ।
