कांग्रेसं उम्मेदवारी लितकासाः माओवादी नं तयार

एकीकृत नेकपा (माओवादीं) नेपाली कांग्रेसं प्रधानमन्त्रीया उम्मेदवारी लितकाःसा थःपिं नं उम्मेदवारी लितकायेत तयार जूगु खँ धाःगु दु ।

बिहीवाः नेकपा (एमाले)या नेतात नाप जूगु खँल्हाबंलाय् एमालें माओवादीयात उम्मेदवारी लितकयाः सहमतिलय् वयेत इनाप याःगु खः । लिसलय् माओवादीं सहमतिया निंतिं थःपिं तयार जूगु धासें कांग्रेसं उम्मेदवारी लितकासाः थःपिंसं नं उम्मेदवारी लितकायेगु खँ धाःगु खः ।

बैठक लिपा पत्रकारत नाप खँल्हाबंला यानादिसें माओवादी उपाध्यक्ष नारायणकाजी श्रेष्ठ 'प्रकाशं' एमालें राष्ट्रिय सहमतिया निंतिं उम्मेदवारी लितकायेत इनाप याःगु धयादिसें कांग्रेस तयार जुसाः उम्मेदवारी लितकायेत माओवादी नं तयार जूगु धयादिल ।

माओवादी संसदीय दलया ज्याकू सिंहदरवारय् च्वंगु बैठकय् निगूलिं दलया शीर्ष नेतातय् उपस्थिति दुगु खः ।