स्वंगू आयोग गठन यायेगु संयन्त्रया निर्णय
संयन्त्र सक्रिय यायेगु सहमित
सरकार संचालनया नितिं गठन जूगु उच्चस्तरीय संयन्त्रं राज्य पुर्नसंरचना बेपत्ता नागरिक छानविन व सत्य निरुपण मेलमिलाप आयोग गठन यायेगु निर्णय याःगु दु ।
मंगलवाः प्रधानमन्त्री निवास बालुवाटारय् च्वंगु संयन्त्रया बैठकं उगु निर्णय याःगु खः । बैठकं सरकारया पाखें शान्ति प्रक्रियायात निष्कर्षय् थ्यंकेगु व संविधान निर्माणय् ग्वहालि यायेत सकसितं अपील यायेगु निर्णय याःगु दु ।
देशय् अप्वयाच्वंगु राजनीतिक गतिरोध अन्त्य यायेत प्रधानमन्त्रीं पुष्पकमल दाहाल प्रचण्डं सतादीगु उच्चस्तरीय संयन्त्रया बैठकय् सत्तासाझेदार दलतय्सं संयन्त्र क्रियाशिल मजूगुलिं सरकार संचालन व देशय् गतिरोध अप्वःगु धासें उच्चस्तरीय संयन्त्रयात प्रभावकारी ढंग क्रियाशिल यायेत सहमत जूगु दु ।
संयुक्त सरकार संचालनया निंतिं तयार याःगु आचारसंहिताया दक्वं पक्षं उल्लंघन जुयाच्वंगु समिक्षा यासें बैठकय् संयन्त्रयात सक्रिय देकेगु सहमति जूगु दु । महत्वपूर्ण राजनीतिक निर्णय यायेस्वयां न्ह्यः सरकारं दलतय् सहमति कायेत संयन्त्रयात प्रभावकारी ढंग संचालन यायेत सिंहदरबार दुने ज्याकू चायेकेगु सहमति नं जूगु दु ।
बैठकय् प्रधानमन्त्री पुष्पकमल दाहाल प्रचण्डं संसद गतिरोध अन्तय यायेत कांग्रेस, एमाले व तराई मधेश लोकतान्त्रिक पार्टीनाप जूगु सहलहबारे जानकारी यानादीगु खः ।
