'अन्तर्राष्ट्रिय तत्वं बदनाम यायेत स्वल'
एकीकृत नेकपा (माओवादीं) प्रधानमन्त्रीया निर्वाचनय् सभासद्त न्याये-मी यात धकाः द्वपं बियाः अन्तर्राष्ट्रिय तत्वं थःगु पार्टीयात बदनामा यायेत स्वःगु खँ धाःगु दु । बिहीवाः माओवादीया पार्टी मू ज्याकू पेरिस डाँडाय् च्वंगु केन्द्रीय समितिया बैठकं माओवादीयात मखूगु द्वपं बिया बदनाम यायेत स्वयाच्वंगु खँ धाःगु खः ।
बैठकय् माओवादी अध्यक्ष पुष्पकमल दाहाल 'प्रचण्डं' मौखिक रुपं १३गू बुँदे प्रतिवेदन न्ह्यब्वयादिसें भारतीय चलखेलया कारणं प्रधानमन्त्री ल्ययेगु ज्या ताः मलाःगु धयादिल । प्रतिवेदनय् नेपालय् अन्तर्राष्ट्रिय चलखेल सतहलय् थ्यंगु खँ न्ह्यथसें थुकीया निंतिं न्हूगु रणनीति दयेकाः न्ह्याः वनेमाःगु खँ दुथ्याकातःगु दु ।
माओवादीया मेगू बैठक भदौ ३ गते च्वनीगु जूगु दु । उगु बैठकय् प्रचण्डया प्रतिवेदन नापं भारतीय प्रधानमन्त्रीया विशेष दुत श्यामशरणं पार्टीया नेतातय्त सामूहिक रुपं नापलाये धुंकाः नं अध्यक्ष प्रचण्ड व उपाध्यक्ष डा. बाबुराम भट्टराईं बिस्कं बिस्कं नापलागु बारे सहलह जुइ । अथेहे माओवादी सभासद् रामकुमार शर्मायात भारतीय दुतावासया कर्मचारीं स्यायेगु ख्याच्वः बीगु बारे नं सहलह जुइगु खँ धाःगु दु ।
