उम्मेदवारी लितकायेत एमालेया इनाप
नेकपा (एमालें) माओवादी व कांग्रेसयात प्रधानमन्त्रीया उम्मेदवारी लितकाये इनाप याःगु दु । बुधवाः पार्टी मुख्यालय मदन नगर बल्खुइ च्वंगु केन्द्रीय कमिटीया बैठकं सहमतिलय् वयेत निगूलिं दलयात उम्मेदवारी लितकायेत इनाप याःगु खः ।
अथेहे बैठकं शान्ति व संविधान निर्माणया निंतिं धासें ९गू बुँदे आधारपत्र नं पारित याःगु दु । आधारपत्रय् माओवादी व कांग्रेसनाप राष्ट्रिय सहमतिया सरकार गठनया निंतिं पहल यायेगु, शान्ति प्रकृयायात तार्किक निष्कर्षय् थ्यंकेगु, माओवादी सेनाया समायोजन व पुनःस्थपना यायेगु लगायतया बुँदात न्ह्यथनातःगु दु ।
बैठकं भदौ २ गते जुइगु न्याक्वःगु खुसीया निर्वाचन स्वयां न्ह्यः हे सहमतिया निंतिं कुतः यायेगु व कुतः ताः मलासाः तटस्थ हे च्वनेगु बिचाः बैठकय् न्ववापिं नेतातय्सं धाःगु खः । उगु निर्वाचनपाखें नं प्रधानमन्त्री मल्यसाः भदौ ३गते बैठक च्वनाः समिक्षा यायेगु निर्णय याःगु दु ।
थ्वहे दथुइ एमालेया वरिष्ठ नेता केपी शर्मा ओली पक्षधर १८म्ह नेतातय्सं न्याक्वःगु चरणया प्रधानमन्त्री निर्वाचन न्ह्यः हे समिक्षा बैठकया माग यासें 'नोट अफ डिसेन्ट' च्वःगु दु । नेतातय्सं भदौ २गते न्ह्यः हे समिक्षा बैठक च्वनेमाःगु माग यासें केन्द्रीय कमिटीया बैठक लिपा 'नोट अफ डिसेन्ट' च्वःगु खः ।
