'भारतीय काउन्सिलरं कुटनीतिक मर्यादा हाजांकाल'
व्यवस्थापिका संसदया अन्तर्राष्ट्रिय व मानवअधिकार समितिं एनेकपा (माओवादी)या सभासद् रामकुमार शर्मायात स्यायेगु धम्की ब्युम्ह भारतीय दूतावासया काउन्सिलरं कुटनीतिक मर्यादा हाजांकाःगु खँ धाःगु दु ।
मंगलवाः सिंहदरवारय् च्वंगु समितिया बैठकं कुटनीतिक मर्यादा हाजांकाम्ह अज्याःम्ह भारतीय कर्मचारीया बारे छानबिन यानाः दोषी ठहर जुसाः देशं पितिनेत सरकारयात निर्देशन ब्यूगु दु । बैठकं परराष्ट्रमन्त्री सुजाता कोइरालानाप स्पष्टिकरण कायेधुंकाः अज्याःगु निर्देशन ब्यूगु खः ।
बैठकय् मन्त्री कोइरालां सभासद् शर्मायात स्यायेगु धम्कीया बारे व श्यामशरणं परराष्ट्र मन्त्रालययात सूचं मबीकं नेपाः भ्रमण याःगु बारे सम्बन्धित पक्षनाप न्यनेकने यानाच्वनाःगु धयादिल । वय्कलं शरणं परराष्ट्र मन्त्रालययात छुं नं सूचं मबीकं नेपाः भ्रमणय् वःगु जानकारी नं बैठकय् बियादिल ।
