समर्थन यायेत प्रधानमन्त्रीयात पौडेलया इनाप
नेपाली कांग्रेस पाखें प्रधानमन्त्रीया उम्मेदवार रामचन्द्र पौडेलं प्रधानमन्त्री माधवकुमार नेपालयात प्रधानमन्त्रीया निर्वाचनय् ग्वाहालि यायेत इनाप यानादीगु दु । मंगलवाः थःगु पक्षय् समर्थन खाकेत प्रधानमन्त्री निवास बालुवाटार थ्यंकादीम्ह पौडेलं थः प्रधानमन्त्री जुसाः शान्ति प्रकृयायात तार्किक निष्कर्षय् थ्यंकेगु व इलय् हे संविधान नं च्वयेगु दावी यानादीगु खः ।
थ्वहे दथुइ मंगलवाः हे कांग्रेस संसदीय दलया ज्याकूथी पत्रकारत नाप खँल्हाबंला यानादिसें वय्कलं सहमतिय प्रकृया पाखें प्रधानमन्त्री ल्ययेमफुगुलिं हे बहुमतीय प्रणालीलय् दुहांवयाःगु धयादिसें थंज्याःगु अवस्थाय् उम्मेदवारी लितकायेमफइगु धयादिल ।
वय्कलं प्रकृयाय् दुहांवनेधुंकूगुलिं उम्मेदावरी लितकासाः देशय् रित्तता व शून्याता जुयाः जनताय् नैरास्यता ब्वलनेफइगु बिचाः प्वंकादिल ।
