माओवादी प्रस्ताव कांग्रेस पाखें अस्वीकार
न्हूगु सरकार गठनया बारे एनेकपा (माओवादीं) तःगु प्रस्ताव नेपाली कांग्रेसं अस्वीकार याःगु दु । माओवादी व कांग्रेसया शीर्ष नेतात दथुइ सोमावाः सुथय् जूगु खँल्हाबंलाय् माओवादीं कांग्रेसयात स्वंगू विकल्प न्ह्यब्वःगु याःगु खः ।
माओवादी संसदीय दलया ज्याकूथी जूगु खँल्हाबंलाय् माओवादीं थःगु हे नेतृत्वय् न्हूगु सरकार गठन यायेगु व उकीयात कांग्रेस नं ग्वाहालि यायेगु, निम्हं उम्मेदवारं नां लितकयाः न्हूम्ह मनूया नांमय् सहमति यायेगु व वर्तमान बहुमतीय निर्वाचन प्रकृयायात हे निरन्तरता बीगु प्रस्ताव तःगु खः ।
खँल्हाबंला लिपा माओवादी उपाध्यक्ष नारायणकाजी श्रेष्ठ 'प्रकाशं' कांग्रेसनाप राष्ट्रिय सहमतिय सरकार निसें दक्वं विषयसं सहलह जूगु कनादिल । वय्कलं राष्ट्रिय सहमतिया निंतिं दक्वं गम्भीर जुसाः माओवादीं उम्मेदवारी लितकायेफुगु धयादिल ।
उगु इलय् कांग्रेसं सरकार गठन स्वयां नं माओवादी लडाकूया समायोजन, छेँबुँ लितबीगु लगायत खँय् बः ब्यूगु खः ।
