कांग्रेसया गुंगू बुँदे माग बारे प्रधानमन्त्रीया लिखित प्रतिबद्धता वइगु
प्रधानमन्त्री पुष्पकमल दाहाल प्रचण्डं सोमवाः च्वनीगु व्यवस्थापिका बैठकय् कांग्रेसं तःगु गुंगू बुँदे माग बारे लिखित प्रतिबद्धता प्वंकीगु जूगु दु ।
सोमवाः प्रधानमन्त्री प्रचण्ड व कांग्रेस नेतात दथुइ जूगु खँल्हाबंला लिपा प्रधानमन्त्रीं लिखित प्रतिबद्धता प्वंकीगु सहमति जूगु खः । सहमति लिपाः सोमवाः च्वनीगु व्यवस्थापिका संसदया बैठक बिना अवरोध सुचारु जुइगु संकेत खनेदुगु दु । कांग्रेसं प्रधानमन्त्री लिखित प्रतिबद्धता प्वंकूसाः संसद बहिष्कार मयायेगु खँ धाःगु दु ।
थ्वस्वयां न्ह्यः सोमवाः सुथय् नेपाली कांग्रेसया सभापति गिरिजाप्रसाद कोइराल निवासय् च्वंगु नेपाली कांग्रेसया बैठकं थःपिंसं तःगु माग बारे प्रधानमन्त्रीं संसदय् लिखित प्रतिबद्धता प्वंकेमाःगु नापं देशय् अप्वया वनाच्वंगु दण्डहिनताया अन्त्य यायेमाःगु माग याःगु खः ।
सोमवाः हे प्रधानमन्त्री प्रचण्डं तराई-लोकतान्त्रीक पार्टीया नेतात नापलासें तमलोपां तःगु झिंस्वंगु बुँदे माग पूवंकेगु प्रतिबद्धता प्वंकूगु खः । प्रधानमन्त्रीया प्रतिबद्धता लिपाः तमलोपां सोमवाः च्वनीगु बैठक बहिष्कार मयायेगु निर्णय याःगु खः ।
अथेहे एमाले नाप नं आइतवाः गुंगू बुँदे सहमति पत्र हस्ताक्षर यानाः संसद सुचारु यायेगु सहमति जूगु खः । लगातर न्याक्वः तकः एमाले व कांग्रेसं संसद बहिष्कार यायेवं प्रधानमन्त्री संसद सुचारु यायेत थीथी दल नाप सहलह यानादीगु खः । व्यवस्थापिका संसदया बैठक सोमवाः स्वताः ईलय् च्वनेत्यंगु दु ।
