अनिज १३दँलय्
नेपाल आदिवासी जनजाति पत्रकार संघ (अनिज) १३दँय् थ्यंगु दु । १२दँ न्ह्यः पलिस्था जूगु अनिजं आइतवाः थीथी ज्याझ्वः यानाः बुदिं हंगु दु । बुदिंया लसताय् अनिजं आदिवासी जनजाति नापं अधिकारकःमि, पत्रकारत नं दुथ्याःगु प्रभातभेरी ज्याझ्वः याःगु खःसा वयां लिपा भिंतुना कालबिल ज्याझ्वः नं याःगु दु ।
ज्याझ्वलय् सभामुख सुवासचन्द्र नेम्वाङं पहाड, हिमाल व तराईया थीथी जाति, भाषा, धर्म, संस्कृतिया दक्वं नेपाःमित छप्पँ जुसाः सुंनं विदेशी तागतं नेपाःमितय्त संकेमफइगु धयादिल । वय्कलं झी मिलेजुसाः सुनां नं छुं यायेमफइगु धयादिसें शान्ति प्रकृया व संविधान च्वयेत नं झी हे छप्पँ जुइमाःगु धयादिल ।
अथेहे ज्याझ्वलय् एनेकपा (माओवादी)या उपाध्यक्ष नारायणकाजी श्रेष्ठ 'प्रकाशं' विदेशी हस्तक्षेप, रष्ट्रिय आत्मसमर्पणवादी व यथास्थितिवादी प्रवृतिया कारणं प्यक्वः तक प्रधानमन्त्रीया निर्वाचन पाखें पाय्छिगु लिच्वः वयेमफुगु दाबी यानादिल ।
