प्यक्वःगु चरणया निर्वाचन नं उपलब्धिहीन
प्यक्वःगु चरणया निर्वाचनय् नं निम्हं उम्मेदवार बूगु दु । थौं जूगु प्यक्वःगु चरणया निर्वाचनय् नं निर्णायक शक्ति कथं कयातःगु नेकपा (एमाले) व संयुक्त लोकतान्त्रिक मधेशी मोर्चा तटस्थ च्वनेवं निर्वाचन उपलब्धिहीन जूगु खः । थौं नं थ्वस्वयां न्ह्यः स्वक्वः तक जूगु निर्वाचनया हे परम्परायात कायम यासें माओवादी उम्मेदवार पुष्पकमल दाहाल 'प्रचण्ड' व नेपाली कांग्रेसया रामचन्द्र पौडेलं बहुमत खाके मफेवं मेगू चरणया निर्वाचन भदौ २ गते जुइगु जूगु दु ।
थौं जूगु निर्वाचयन् प्रचण्डया पक्षय् २१३, विपक्षय् ९९ व तटस्थय् १५६ लाःगु खः । ४६८ सभासद्तय्सं जक ब्वति काःगु निर्वाचन प्रकृयाय् माओवादीया हे २६सभासद्तय्स नं ब्वति मकाः । थ्वस्वयां न्ह्यः प्रचण्डया पक्षय् साउन ५, ७ व १७ गते छसिकथं २४२, २४१ व २५९ मत प्राप्त जूगु खः ।
पौडेलया निंतिं जूगु निर्वाचनय् कुल ५६१ सभासद्त दुगु खःसा वय्कया पक्षय् १२२, विपक्षय् २४५ व तटस्थय् १९४ मत लाःगु खः । थ्वस्वयां न्ह्यः पौडेलया पक्षय् साउन ५ गते १२३, ७ गते १२४ व १७ गते १२४ मत लाःगु खः ।
