थौं नं प्रधानमन्त्री ल्यइगु सम्भावना म्हो
नेपाःया न्हूम्ह प्रधानमन्त्रीया निंतिं थौं प्यंगूगु चरणया निर्वाचन जुइत्यंगु दु । न्हूम्ह प्रधानमन्त्रीया लागि एनेकपा (माओवादी)या अध्यक्ष पुष्पकमल दाहाल 'प्रचण्ड' व नेपाली कांग्रेसया संसदीय दलया नेता रमचन्द्र पौडेल प्रधानमन्त्री पदया लागि मौदानय् दु । तर निर्वाचनय् निर्णायक भूमिकाय् दुगु नेकपा (एमाले) व संयुक्त लोकतान्त्रिक मधेशी मोर्चा थौं नं तटस्थ च्वनीगु जूगुलिं प्रधानमन्त्री ल्यइगु सम्भावना म्हो जक दु ।
एमालें बहुमतीय आधारय् जुइगु प्रधानमन्त्रीया निर्वाचनय् मतदान मयायेगु धकाः केन्द्रीय कमिटीं याःगु निर्णययात कायम हे यानातःगु दुसाः मधेशी मोर्चा धाःसा तटस्थ च्वनेगु वा छु यायेगु धइगु बारे निर्णय यायेत बैठक च्वनाच्वंगु दु । मोर्चां थ्वस्वयां न्ह्यः १३बुँधे आधारपपत्र न्ह्यब्वसें उकीयात कार्यान्वयन यायेत प्रतिबद्धता प्वंकेगु दलयात समर्थन यायेगु निर्णय याःगु खः । आधारपत्रया बारे माओवादी व कांग्रेस निगूलिं दलं लिखित लिसः बीधुंकूसां मोर्चा अझ नं सुयात समर्थन यायेगु बारे निर्णय यायेमफुनी ।
थ्वहे दथुइ स्वंगूगु चरणया निर्वाचनय् मोर्चाया छगू घटक मधेशी जनअधिकार फोरमया ११म्ह सभासद्तय्सं मोर्चाया निर्णय पलना मयासें फ्लोर कर्स याःगु बारे नं मोर्चाया बैठकय् सहलह जुयाच्वंगु दु । उखे स्वंगूगु चरणया निर्वाचनय् नेकपा (माले)या छम्ह सभासदं नं पार्टी निर्णय विपरित माओवादीया उम्मेदवारयात मत ब्यूगु खः।
प्रधानमन्त्री ल्यये मफयाच्वंगु इलय् हे भारतीय प्रधानमन्त्रीया विषेश दूत श्यामशरणया नेपाः भ्रमणं न्हूगु मोड काइगु खँ धाःगु दु । सीदुकथं शरणं कांग्रेस, एमाले व मधेशी मोर्चाया नेतातय्त नापलाना माओवादीयात 'साइज'य् महयेकं उमिगु नेतृत्वय् सरकार गठन यायेमज्यूगु खँ धाःगु खः । तर माओवादी नेतृत्व नापया खँल्हाबंलाय् शरणं थःगु भ्रमण सरकार गठननाप छुं स्वापू मदुगु खँ धाःगु खः ।
