'सहमतिया लागि मार्ग प्रशस्त या'
नेकपा (एमाले), मधेशी मोर्चा सहित चिधंगु १८दलं एनेकपा (माओवादी) व नेपाली कांग्रेसयात थःथःगु उम्मेदवारी लितकायेत इनाप याःगु दु । एमालेया ग्वासालय् जूगु १८दलया बैठकं निगूलिं दलयात उम्मेदवारी लितकयाः सहमतिय सरकारया निंतिं मार्ग प्रशस्त यायेत इनाप याःगु दु । बहुमतीय आधारया सरकारं शान्ति व संविधानयात निष्कर्षय् थ्यंकेमफइगु दावी नं १८दलं याःगु दु ।
एमाले मू ज्याकू मदननगर बल्खुइ च्वंगु बैठकं बहुमतीय आधारय् जुयाच्वंगु प्रधानमन्त्रीया निर्वाचनय् गैरसंसदीय, विकृति व अनुशासनहीन ज्या जुयाच्वंगु प्रति नं आपत्ति प्वंकूसें अज्याःगु ज्या दीकेत इनाप याःगु दु । प्रधानमन्त्रीया निंतिं प्यक्वःगु चरणया निर्वाचन जुइ छन्हु न्ह्यः माओवादी व कांग्रेसयात दबाव बीगु कथं १८दलया बैठक च्वंगु खः ।
अथेहे बैठकं माओवादी सेनां न्हूगु भर्ना चायेकूगु खँ शान्ति सम्झौता विपरितया ज्या जूगु धासें आपत्ति प्वंकूगु दु । नापं भर्ना प्रकृया तत्काल दिकेत नं माओवादीयात इनाप याःगु दु ।
