सरकार निर्माणय् ल्हाः मदु : शरण
भारतीया प्रधानमन्त्री डा. मनमोहन सिंहया विशेष दूत श्याम शरणं नेपाःया सरकार गठनय् थःगु छुं ल्हाः मदइगु खँ धयादीगु दु । राजनीतिक दलया नेतातय्त नापलायेगू ज्यायात तीव्रता बियादीसें बिहीवाः एनेकपा (माओवादी)या नेतात नापलानादिसें वय्कलं शान्ति, संविधान निर्माण व राष्ट्रिय सहमतिया विषयलय् भारतं च्यूताः प्वंकूगु धयादिसें सरकार निर्माण यायेगु ज्याय् थःगु भ्रमया केन्द्रीत मजूगु धयादिल ।
माओवादी अध्यक्ष पुष्पकमल दाहाल 'प्रचण्ड'या न्हू बजारय् च्वंगु छेँय् जूगु खँल्हाबंलाय् शान्ति व संविधान निर्माणया बारे सहलह जूगु खँ माओवादी उपाध्यक्ष नारायणकाजी श्रेष्ठ 'प्रकाशं' कनादिल । उगु इलय् माओवादीं शान्ति, संविधान, सेना समायोजनया बारे पार्टीया धारण तःगु खः ।
थौं हे विषेश दूत शरणं नेपाली कांग्रेसया कार्यवाहाक सभापित सुशील कोइरालानाप नं खँल्हाबंला यानादीगु दु । कोइराला नाप जूगु खँल्हाबंलाय् सुदं शान्ति प्रकृया व संविधान निर्माण न्ह्यामवंगु प्रति चिन्ता प्वंकादीगु खः । नापं वय्कलं नेपाःया शान्ति प्रकृया याकनं क्वचामाः धकाः भिंतुना नं बियादीगु खः ।
अथेहे शरणं नेकपा (एमाले)या अध्यक्ष झलनाथ खनालनाप नं खँल्हाबंला यानादिसें शान्ति प्रकृयाया बारे च्यूताः प्वंकादिसें शान्ति प्रकृया ताः लाकेत भारतं ग्वाहालि यानाच्वनीगु धयादिल ।
