आन्दोलनया कारणं चिकंया अभाव तच्वल

नेपाल आयल निगमया कार्मचारीतय् आन्दोलनया कारणं सर्वसाधारणयात सास्ती जूगु दु । निगमया कर्मचारीतय्तसं बोनस दयेमाःगु लगायत १३सूत्रीय माग यासें बुधवाः निसें देय्न्यंकया चिंकया अभाव शुरु जूगु खः । मंगलवाः बहनी तक निगमं चिकं ब्यूगुलिं बुधवाः आपूर्तिइ छुं भचा राहत जुसां बिहीवाः थुकीया मार अप्वः लाःगु दु ।

ताः ई न्ह्यः निसें घाटाय् लानाच्वंगु निगमया कर्मचारीतय्सं आन्दोलन यायेवं बुधवाः बहनी व्यवस्थापन व कर्मचारीत दथुइ वार्ता जुसां छुं निष्कर्ष धाःसा पिकाये मफुत । थ्वस्वयां न्ह्यः निगमं फ्याःगु बोनस बीत सरकारं अनुति मबीवं कर्मचारीत आन्दोलित जूगु खः । बोनस वितरणया सम्बन्धय् अख्तियार दुरुपयोग अनुसन्धान आयोगं नं निगम घाटाय् लानाच्वंगु धासें बोनस मइनेत सरकारयात पौ छ्वःगु खः ।