भारतीय प्रमया विशेष दूत शरण येँय्

भारतीय प्रधानमन्त्रीया विशेष दूत श्याम शरण बुधवाः येँ थ्यंकादीगु दु । नेपालय् प्रधानमन्त्री ल्ययेमफयाच्वंगु इलय् नेपाःया निंतिं भारतया पुलांम्ह राजदुत नं जुयादीम्ह शरण येँय् थ्यंकादीगु दु ।

बुधवाः न्हिनय् त्रिभुवन अन्तर्राष्ट्रिय विमानस्थलय् पत्रकारत नाप खँल्हाबंला यानादिसें शरणं भारतं नेपालय् शान्ति स्थापना व न्हूगु संविधान याकनं निर्माण जूगु स्वये चाहेजूगु कनादिल । वय्कलं थः भारतीय प्रमया विशेष दूतया कथं नेपाः वयागु खुलासा यानादिसें नेपाःया राजनीतिक गतिरोध क्वचायेकेत नेपाःया प्रमुख दलया शीर्ष नेतात नाप सहलह यायेगु कनादिल ।

तत्कालीन माओवादी व न्हय्गू दल दथुइ न्हय्गू बुँदे सम्झौता यायेत नं सहजकर्ताया भूमिका म्हितादीम्ह शरणया नेपाः भ्रमणयात तसकं अर्थपूर्ण रुपं काःगु दु ।