देय्या परिस्थितिया बारे राष्ट्रपति यादवं चिन्ता प्वंकल
राष्ट्रपति डा. रामवरण यादवं स्वंगूगु चरणया निर्वाचन पाखें नं प्रधानमन्त्री ल्ययेमफुगुलिं देय् न्ह्यावनेमफुगु धासें चिन्ता प्वंकूगु दु । बुधवाः नेकपा (एमाले)या अध्यक्ष झलनाथ खनालयात नापलानादिसें राष्ट्रपति यादवं थंज्याःगु चिन्ता प्वंकादीगु खः । राष्ट्रपतियात नापलायेधुंकाः पत्रकारत नाप खँल्हाबंला यानदिसें खनालं देय्या परिस्थिति प्रति राष्ट्रपतिं चिन्ता प्वंकादीगु धयादिल ।
राष्ट्रपति भवन शितल निवासय् जूगु खँल्हाबंलाय् यादवं प्रधानमन्त्री ल्ययेगु निंतिं दलत दथुइ जुयाच्वंगु कुतःया बारे च्यूताः प्वंकादीगु खः । दलत दथुइ याकनं हे सहमति जुइगु विश्वास प्वंकादिसें यादवं याकनं राजनीतिक दलत छगू हे थासय् वयाः न्ह्याः वनेत इनाप यानादिल । उगु इलय् अध्यक्ष खनालं राष्ट्रिय सहमतिया सरकार निर्माणया निंतिं एमालें म्हिताच्वंगु भूमिकाया बारे जानकारी बियादीगु खः ।
