'सेना व माओवादीं शान्ति सम्झौताया उल्लंघन'

नेपाः स्थित संयुक्त राष्ट्रसंघीय मिसन अनमिनं नेपाली सेना व माओवादी निगूलिं पक्षं शान्ति सम्झौताया उल्लंघन याःगु खँ धाःगु दु । निगूलिं पक्षं थःथःगु सेनाय् न्हूगु भर्ना चायेकाः शान्ति सम्झौताया उल्लंघन याःगु टिप्पणी अनमिनं याःगु दु । नेपाली सेनां न्हूगु भर्ना आह्वान याःगु कन्हय् कुन्हु माओवादीं नं भर्ना आह्वान यायेवं अनमिनं थुगु टिप्पणी याःगु खः ।

मंगलवाः छगू विज्ञप्ति पिथना अनमिनं नेपाली सेना व माओवादी सेना सुनां नं न्हूगु भर्ना चायेकेगु खँ विस्तृत शान्ति सम्झौता व हातहतियार तथा सेना व्यवस्थापन अनुगमन सम्बन्धी सम्झौताया च्वयामतःगु खँ न्ह्यथनातःगु दु । अथेहे थुगु भर्ना आह्वानं अनमिन तसकं चिन्तित जूगु खँ नं विज्ञप्तिइ न्ह्यथनातःगु दु ।