माओवादीं लडाकुया भर्ना चायेकल
नेपाली सेनां न्हूगु भर्ना चायेकूगु छन्हु लिपा हे एनेकपा (माओवादीं) नं थःगु लडाकुतय् लागि भर्ना चायेकूगु दु । माओवादीं लडाकुत तयातःगु न्हय्गूलिं शिविरय् १२द्वं न्हूपिं लडाकुतय् निंतिं भर्ना चायेकूगु दु ।
मंगलवाः येँय् छगू पत्रकार सम्मेलन यानाः जनमुक्ति सेनाया प्रवत्ता चन्द्रप्रकाश खनालं माओवादी सेनां १८दँ दुपिं स्वस्थ्य, सक्षम, साक्षर, शैक्षिक योग्यता दुपिं व राष्ट्रिय भावना दुपिं नेपाली नागरिकतय्त दरखास्त आह्वान यानागु जानकारी बियादिल । वय्कलं नेपाली सेनां भर्ना प्रकृया चायेकूगुलिं जनमुक्ति सेनाय् नं अज्याःगु हे भर्ना प्रकृया आह्वान यानागु धयादिसें नेपाली सेनां भर्ना आह्वना लितमकातल्ले माओवादीं पदपूर्तिया दरखास्त कायेगु धयादिल ।
माओवादीं जनमक्ति सेना दुने नं थीथी कारणवश दरबन्दी खाली जूगुलिं नेपाली सेनां भर्ना प्रकृया लितमकातल्ले स्वतः आवश्यक्ताया आधारय् जनमुक्ति सेनां नं खाली जूगु उगु दरबन्दीया पदपूर्ति यायेत न्हापा स्थगित यानातःगु भर्ना प्रकृयायात न्ह्याकेत्यनाःगु जानकारी ब्यूगु दु ।
