मेगू चरणय् नं लिच्वः मवसाः कांग्रेसं निर्वाचनय् ब्वति मकाइगु
नेपाली कांग्रेसं साउन २१ गते प्रधानमन्त्रीया लागि जुइगु प्यंगूगु चरणया निर्वाचनय् नं लिच्वः मवसाः मेगू चरणय् ब्वति मकायेगु निर्णय याःगु दु । स्वक्वः तक प्रधानमन्त्री पदया लागि जूगु निर्वाचनय् सुनं उम्मेदवारं त्याकेमफेवं कांग्रेसया पदाधिकारीतय् बैठकं थंज्याःगु निर्णय याःगु खः । कांग्रेस कार्यवाहाक सभापति सुशिल कोइरालाया महारजगंजय् दुगु छेँय् मंगलवाः सुथय् च्वंगु बैठकय् नेतातय्सं तःक्वः तक निर्वाचन जुसां प्रधानमन्त्री ल्यये मफुगु व उकीं जनताय् नकारात्मक लिच्वः लाःगु धासें प्यंगूगु चरण लिपा बहुमतीय प्रकृयाय् ब्वति मकायेगु खँ धाःगु खः ।
कांग्रेसं प्यंगू चरण लिपा माओवादी व एमाले नाप सहलह यानाः विकल्प मालेगु खँ क्वःछिउगु दु । तर वस्वयां न्ह्यः मेगू चरणया निर्वाचनया निंतिं एमाले व मधेशी मोर्चा नाप निर्णायक सहलह यायेगु निर्णय नं कांग्रेसं याःगु दु ।
