स्वक्वःगु खुसी नं प्रधानमन्त्री ल्यये मफुत
न्हूम्ह प्रधानमन्त्री ल्ययेत जूगु स्वक्वःगु खुसीया निर्वाचन पाखें नं प्रधानमन्त्री ल्यये मफुत । सोमवाः च्वंगु व्यवस्थापिका संसदया बैठकय् एनेकपा (माओवादी)या उम्मेदवार पुष्पकमल दाहाल 'प्रचण्ड
व नेपाली कांग्रेसया उम्मेदवार रामचन्द्र पौडेल हानं पराजीत जुइमाःगु दु । थौं नं नेकपा (एमाले) लगायत संयुक्त लोकतान्त्रिक मधेशी मोर्चा नाप आवद्ध प्यंगू मधेशी दल, नेकपा (माले) लगायत दलत तटस्थ च्वंगु खः । निक्वःगु चरण तक तटस्थ च्वंगु नेपाल मजदुर किसान पार्टीं धाःसा थौं माओवादीयात समर्थन याःगु खः ।
सोमवाः न्हिनय् ४ बजे च्वनेगु धकाः क्वछिनातःगु संसदया बैठक ८२ सिट दुगु मधेशी मोर्चाया बैठकया कारणं ४ घण्टा लिपा जक न्ह्याःगु खः । संसद न्ह्यायेवं संसदीय नियमावलीया व्यवस्था कथं जूगु निर्वाचनय् माओवादीया उम्मेदवार प्रचण्डया पक्षय् २५९, विपक्षय् ११४ व तटस्थय् २०८ मत कुतुवंगु खः । उगु इलय् बैठकय् ५८१ सभासदतय् उपस्थिति दुगु खः ।
अथेहे ५५६ सभासदत उपस्थित जूगु इलय् पौडेलया उम्मेदवारीलय् जूगु मतदानय् पक्षय् १२४, विपक्षय् २४६ व तटस्थय् १८६ मत लाःगु खः । थ्वस्वयां न्ह्यः साउन ५ व ७ गते जूगु प्रधानमन्त्रीया निर्वाचनय् नं निम्ह उम्मेदवार पराजीत जूगु खः । प्रचण्डं ५ व ७ गते छसिकथं २४२ व २४१ मत प्राप्त याःगु खःसा पौडेलं १२३ व १२४ मत प्राप्त याःगु खः ।
थौं संसदया बैठक च्वने स्वयां न्ह्यः नेमकिपां प्रधानमन्त्रीया उम्मेदवारया लागि माओवादीयात समर्थन यायेगु निर्णय याःगु खःसा मधेशी मोर्चाया बैठकं अन्तिम इलय् वयाः तटस्थ च्वनेगु निर्णय याःगु खः । एमालें धाःसा म्हिग हे थःगु सभासद्तय्त तटस्थ च्वनेत ह्वीप जारी याःगु खः ।
