बैंकक हुलाक प्रदर्शनीइ नेपाःया ब्वति

थाइल्यान्डया राजधानी बैंककय् थ्वहे साउन १९ निसें २७ गतेतक याइगु नीन्याक्वःगु एसियाली अन्तर्राष्ट्रिय हुलाक टिकट प्रदर्शनीइ नेपालं नं ब्वति काइगु जूगु दु । उगु प्रदर्शनीइ नेपाःयापाखें राष्ट्रिय आयुक्त दीपक मानन्धर जुयादीगु दुसा श्यामप्रसाद प्रधान निर्णायक समितिया दुजः जुरी च्वनादीगु खः ।

उगु धेंधेंबल्लाःया प्रदर्शनीइ दीपक मानन्धरया स्टेसनरी अफ नेपाल, विनय मानन्धरया मिसप्रिन्ट एन्ड एरर स्टाम्पस, नारायणदास श्रेष्ठया क्लासिक नेपाल, हीरारत्न तुलाधरया बुद्ध एण्ड बुद्धिज्म इन स्टाम्पस व ओमकारलाल जोशीया रिभेन्यु स्टाम्पस अफ नेपाल विषयक सङ्कलन न्ह्यब्वइगु नेपाल फिलाटेलिक सोसाइटीया छ्याँजे शङ्कर श्रेष्ठं धयादिल । उगु प्रदर्शनीइ हुलाक टिकट सङ्कलक जयहरि झां पर्यवेक्षकयारुपं ब्वति काइगु जूगु दु ।