स्वदँदुने नेपाली सेनाया पुनःसंरचना
स्वदँयादुने नेपाली सेनाया पुनःसंरचना यायेधुंकीगु गुंगू बुँदे योजना लिसेया प्रतिवेदन कामचलाउ सरकारया प्रधानमन्त्री माधवकुमार नेपाल दथुइ न्ह्यःब्वःगु दु ।
रक्षामन्त्री व नेपाली सेनाया लोकतान्त्रिकरण कार्ययोजना तर्जुमा समितिया कजि विद्यादेवी भण्डारीं थौं प्रधानमन्त्रीयात प्रतिवेदन लःल्हाःगु खः । सेनायात लोकतान्त्रिकरण यायेत न्हापांनिसें आःतक कायम जुयाच्वंगु गुलिखय् ऐनया परिमार्जन जननिर्वाचित सरकारया मातहतय् हयेगु व नागरिक सर्बोच्चता अनुकूलया सैनिक ऐनत दयेकेगु लगायतया विषयत प्रतिवेदनय् कःघानाःतःगु दु ।
प्रतिवेदन लःल्हानाः कयादिसें प्रधानमन्त्री नेपालं देय् संघीय लोकतान्त्रिक गणतन्त्रय् दुहांवनेधुंकूगु व नेपाली सेनां जनआन्दोलनलिपाया हिउपाःयात ग्वाहालि व अनुसरण यायेधुंकूगु अवस्थाय् सेनाया पूर्ण लोकतान्त्रिकरणया निंतिं माःगु पलाःत न्ह्याकेमाःगु धयादीगु दु ।
प्रधानमन्त्रीयात प्रतिवेदन लःल्हायेधुंकाः पत्रकारतलिसे खँल्हानादिसें रक्षा छ्याँजे नविनकुमार घिमिरें स्वदँयादुने सेनाया न्हूगु संरचना दयेकेगु योजना प्रतिवेदनय् दुथ्याकूगु जानकारी बियादीगु दु । सेनाया ल्याः म्हो यायेगु कि मयायेगु धइगु विषयसं धाःसा प्रतिवेदन मौन दु । रक्षा छ्याँजे घिमिरें सेनाया लोकतान्त्रिकरण व पुनःसंरचनालिसे हे ल्याः थःहे क्वःछुइगु दावी यानादीगु खः । प्रतिवेदन राजनीतिक दलतदथुइया दलीय सहमति लिसे व्यवस्थापिका संसदया राज्यव्यवस्था समितिया नापं सहमति कयाः न्हूगु संविधान पिथनेधुंकाः धाःसा सरकारं लागू याइ ।
