कन्हय् नं एमाले तटस्थ च्वनीगु

प्रधानमन्त्रीया निंतिं कन्हय् जुइगु स्वंगूगु चरणया निर्वाचनय् नं नेकपा (एमाले) तटस्थ च्वनीगु जूगु दु । प्रेस चौतारीं आइतवाः येँ याःगु छगू ज्याझ्वय् न्ववानादिसें एमाले महासचिव ईश्वर पोखरेलं एमाले अझ नं पुलांगु हे अडानय् दुगु धयादिसें बहुमतीय आधारय् गठन जुइगु सरकारया पक्षय् एमाले मदुगु धयादिल ।

सहमतिया निंतिं दक्वं पार्टीतय्सं न्हूगु तरिकां बहस न्ह्याकेमाःगु धयादिसें वय्कलं बहुमतीय आधारय् गठन जूगु सरकारं शान्ति व संविधानयात तार्किक निष्कर्षय् थ्यंकेमफइगु दावी यानादिल । वय्कलं प्रधानमन्त्रीया निर्वाचनय् एमाले तटस्थ च्वनाः देय्यात अनिर्णयया बन्दी फसेयात धाःगु द्वपंयात पूर्वाग्रहीया संज्ञा बियादिल ।