सेनाया शैली पंचायती शैली थें ज्वः लाःगु रक्षामन्त्रीया धापू

रक्षामन्त्री रामबहादुर थापा बादलं नेपाली सेना पंचायती शैलीइ न्ह्यावनाच्वंगु द्वपं बियादीगु दु । वयेकलं पंचायति शैलीं सेनां ख्यायेवं सरकार मग्याइगु खँ धयादीगु दु । वयेकलं धयादिल - 'सेनाया ज्या ब्यारेकय् च्वनेगु खः सरकारयात ख्यायेगु मखु ।'

आइतवाः गुल्मीइ पत्रकारतनाप खँ ल्हानादीसें रक्षामन्त्री थापां सेना अझ नं लोकतान्त्रिक जुइमफूगु टिप्पणी यानादिल । राष्ट्रिय पंचायतया दसू ब्यूसें वयेकलं - 'सेनां अझ नं अज्याःगु हे पहः क्यनाच्वंगु दु तर जी ल्यूने वनेमखु ।' राष्ट्रिय पंचायतय् सेनां जनप्रतिनिधितय्त ख्याइगु व आः नं सेनां अथेहे यायेत स्वयाच्वंगुलिं सरकार व सेनाया दथुइ दूरी तापाःगु दाबी यानादिल । 'सेनापति वा सुंनं सेनां ख्यायेवं आः रक्षा मन्त्रालय्, सरकार व सदन ग्याइमखु ।' वयेकलं धयादिल - 'न्हापा राष्ट्रिय पंचायतयात सेनां ख्याइगु व सेनाया बारे न्ववायेत राष्ट्रिय पंचायत ग्याः ।'


रक्षामन्त्री तम्घासय् थ्यंगु ईलय् धासाः गुल्मीइ च्वंगु भैरप्रसाद गणया सैनितय्सं धासाः रक्षामन्त्रीयात लसकुस याःगु खः । रक्षा मन्त्रालय् व सेना दथुइया विवाद लोकतान्त्रिक प्रक्रियापाखें मालेगु धासें रक्षामन्त्री थापां सेनया जर्नेलतय् अवकास दिकेत सर्वोच्चं ब्यूगु आदेश गलत जूगु दाबी यानादिल । सेना समायोजन व पुनःस्थापना प्रक्रिया अन्तिक चरणय् थ्यंगु व असार मसान्त तकः सेना समायोजन जुइगु दावी यानादिल ।

थ्वहे दथुइ सरकार व सेना दथुइया स्वापू ख्वाँउगु ईलय् आइतवाः निसें येँय् पृतनापतितय् सम्मलेन शुरु जूगु दु । अज्याःगु सम्मेलनय् रक्षामन्त्री व रक्षा सचिव सहभागि जुइगु परम्परा दुसां थुसी रक्षामन्त्री सहभागि जुयामदी । रक्षामन्त्री थ्व सम्मेलन नियमित जूगु प्रतिक्रिया बियादीगु दु ।