'मधेशी मोर्चाया रिमोट भारतया ल्हातय्'
येँ (सन्ध्या टाइम्स)/आदिवासी जनजाति दलित गणतान्त्रिक मोर्चाया नायः किश्वर सिंह विश्वासं प्यंगू मधेशवादी दलया मंकाः मोर्चाया रिमोट कन्ट्रोल भारतया ल्हातय् दु धयादीगु दु ।
वय्कलं 'सन्ध्या टाइम्स' लिसे खँ ल्हासें मधेशी मोर्चां गुगुं नं हालतय् एकीकृत माओवादीयात स्वीकार याइ मखु धकाः नं दावी यानादिल। छगू इलय् थारू समुदायपाखें थारू स्वायत्त प्रदेशया माग यानाः आन्दोलन न्ह्याकाः चर्चाय् वःम्ह विश्वासं भारत नपालय् न्हूगु संविधान दयेकेगु पक्षय् मदुगुलिं मधेशवादी दलतय्त नं उगु हे कथं प्रयोग यानाच्वंगु खः धयादिल। आःया अवस्थाय् माओवादी नेतृत्वय् सरकार दयेकेगु भारतया चाहना मखुगुलिं माओवादीं छाति हे फायाः प्रतिबद्धता प्वंकूसां मधेशी मोर्चां माओवादीयात समर्थन याइ मखु धकाः वय्कलं दावी यानादिल। कन्हय् जुइगु प्रधानमन्त्री चुनावय् नं सुं हे मत्याइगु भविष्यवाणी यासें वय्कलं प्यंगूगु चरणया चुनाव तकया दुने भारत व कांग्रेसं केपी ओली, विद्या भण्डारी व माधव नेपाल गुटयात पार्टी हे तछ्यानाः जूसां थःगु पक्षय् हयाः चुनाव त्याकेत स्वइगु दावी नं यानादिल ।
