३० गते जनजातिपाखें चक्काजाम घोषणा
येँ (सन्ध्या टाइम्स)/नेपाल आदिवासी जनजाति महासंघं थ्वहे वइगु साउन ३० गते देय्न्यंकं चक्का जाम यायेगु घोषणा याःगु दु। जनजाति महासंघया महासचिव आङकाजी शेर्पां 'सन्ध्या टाइम्स'लिसे खँल्हासें थौं हे विज्ञप्ति पिथनाः उगु ज्याझ्वः सार्वजनिक याइगु जानकारी बियादिल ।
जातीय आधारय् स्वायत्त प्रदेशत दयेकेमाःगु नापं थीथी कथंया माग तयाः आन्दोलन यायेगु झ्वलय् थ्वसिबें न्ह्यः महासंघं ३० गते स्वनिगःयात जक नाकाबन्दी यायेगु ज्याझ्वः घोषणा यानातःगु खः। थ्वहे झ्वलय् महासंघं जनजाति आन्दोलनयात अझ तीव्रता बिया यंकेगु निंतिं थनिंनिसें थीथी पक्षलिसे विचार गोष्ठी नं यायेत्यंगु दु ।
थौं पूर्वाञ्चल बन्द
क्षतिपूर्ति माग यानाः यातायात मजदूरतय्सं थौं पूर्वाञ्चलय् यातायात बन्द यात। वंगु फागुन २६ गते झापाय् दायाः स्याना बिउम्ह चालकया क्षतिपूर्ति मबिउगु खँयात कयाः थ्व बन्द याःगु खः ।
