कवि डा. शाक्यया 'स्वापू' उलेज्या
येँ (सन्ध्या टाइम्स)/नेपालभाषाया कवि डा. केशवमान शाक्यया न्हूगु कविता सफू 'स्वापू' म्हिगः छगू ज्याझ्वःया दथुइ विमोचन जुल। जनकवि दुर्गालाल श्रेष्ठं सफूया द्यबः उलाः सफू विमोचन यानादीगु खः ।
ज्याझ्वलय् न्ववासें कवि श्रेष्ठं थ्व सफू ब्वनाः थम्हं नेपालभाषा काव्य ख्यलय् छगू न्हूगु विधाया कुलां चाःगु महसुस जूगु बिचाः प्वंकादिल ।
विमोचित सफूयात कयाः टिप्पणी यासें प्रा. नर्मदेश्वर प्रधानं निम्हतिपूया अतिकं निजात्मक स्वापूयात सफुली कविताया माध्यमं व्यक्त यानातःगु आकर्षक जू धयादिल ।
साहित्यकार भूषणप्रसाद श्रेष्ठं कविया म्हसीका बिसें वय्कःया न्हूगु व पुलांगु काव्य रचनाया चर्चा यानादिल। कुतः पिकाकया विमल ताम्राकारं लसकुस यासें न्ह्याकूगु उगु ज्याझ्वलय् कवि शाक्य नापं कविपिं पूर्ण वैद्य, बुद्ध साय्मि, सुरेश किरण व रश्मी नापितं विमोचित सफुली दुथ्याःगु कविता पाठ यानादीगु खः ।
