संविधान देयेकेत माओवादी नेतृत्वयात दवाब बीमाः कोइराला
नेपाली कांग्रेसया सभापति व पुलांम्ह प्रधानमन्त्री गिरिजाप्रसाद कोइरालां संविधान देयेकेगु ज्या ईलय् हे क्वच्याकेत मोओवादी नेतृत्वयात दवाब बीमाःगु खँ धयादीगु दु ।
आइतवाः सुथय् नागरिक समाजया प्रतिनिधितनाप खँ ल्हासें देशय् दण्डहीनताया अवस्था अन्त्य यायेत माओवादी नेतृत्वयात दबाव बीत नागरिक समाजया प्रतिनिधियात इनाप यानादीगु दु । वयेकलं जनताया जीवन थप कष्टकर जुयावनाच्वंसां माओवादी नेतृत्वया सरकारं छुं पहल मायाःगुलि कूंखिनादिल । कोइरालां थः संविधान निर्माणय् पूर्ण प्रतिबद्ध जूगु खँ धासें लोकतन्त्र व नागरिक अधिकार कुण्ठित याइगु संविधान निर्माण यायेगु पाखे सुं न्ह्याः वनीसाः उकीया विरोद्ध यायेगु धयादिल ।
देशय् खनेदुगु अन्योल व संवादहीनतां संविधान निर्माण यायेगु ज्याय् पंगः थनीगु निष्कर्ष पिकासें नागरिक समाजया प्रतिनिधिं प्रमुख राजनीतिक दलया नेतातय्त नापलाय्गु झ्वलय् आइतवाः कोइरालायात नपलाःगु खः ।
खँल्हाबंला लिपा पत्रकारत लिसे खँल्हानादिसें नागरिक समाजया प्रतिनिधि देवेन्द्रराज पाण्डें - 'न्हापा शान्ति प्रकृयाया नेतृत्व गिरिजाबाबु नं हे यानादीगुलिं आः संवादहीनतया अन्त्य यायेत नं वयेकलं हे पहल यायेत झिसं इनाप यानाः ।' कोइरालां माओवादीं देशय् दण्डहीनतायात प्रश्रय ब्यूगु धासें उकीया नागरिक समाजं नं विरोद्ध यायेमाःगु खँ धयादिल ।
