मोर्चां थौं धारणा सार्वजनिक याइगु
एकीकृत नेकपा (माओवादीं) थःपिनिगु १६ बुँदे आधारपत्रया लिखित लिसः बीवं मधेशी मोर्चां थौं उकीया बारे धारणा सार्वजनिक याइगु जूगु दु । माओवादीं म्हिग लःल्हाःगु लिसःया अध्ययन यानाः थौं न्हिनय् सद्भावना पार्टीया संसदीय दलया ज्याकूथी छगू पत्रकार सम्मेलन यानाः आधिकारिक धारणा सार्वजनिक यायेत्यंगु दु ।
न्हूगु सरकार गठनय् महत्वपूर्ण भूमिका म्हिता च्वंगु मोर्चाया धारणा कथं कन्हय् जुइगु प्रधानमन्त्रीया निर्वाचनं प्रधानमन्त्री ल्यइ वा ल्यइमखु धइगु खँ सीदइ । संविधानसभाय् ८२ सिट दुगु मोर्चां माओवादीया लिसःयात सकारात्म रुपं काःसा कन्हय् देय्या न्हू प्रधानमन्त्री कथं माओवादी अध्यक्ष पुष्पकमल दाहाल 'प्रचण्ड' ल्यइ ।
माओवादीं छ्वःगु लिसलय् एक मधेश एक प्रदेश स्वीकार यायेमफइगु तर आत्मनिर्णयया अधिकार सहित स्वायत्त मधेश प्रदेशया खँय् धाःसा सहमति प्वंकूगु खः । माओवादीं लिखित लिसः छ्वःगु कन्हय् कुन्हु नेपाली कांग्रेसं नं मधेशीतय्त थःगु पक्षय् कायेत थौं लिसः छ्वयेत्यंगु दु ।
