माओवादीं मधेशी मोर्चायात लिखित लिसः बिल
प्यंगू मधेशी दलत दुथ्याःगु मधेशी मोर्चां न्ह्यब्वःगु आधारपत्रय् दुथ्याःगु अधिंकाश बुँदाय् सहमति प्वंकूसें एनेकपा (माओवादीं) मोर्चायात लिखित लिसः ब्यूगु दु । माओवादीं एक मधेश एक प्रदेशया माग धाःसा स्वीकार यायेमफइगु तर भौगोलिक अखण्डताय् आँच मलाइगु कथं आत्मनिर्णयया अधिकार सहित तराई-मधेशय् मेमेगू प्रदेश नापं स्वायत्त मधेश प्रदेशया निंतिं धाःसा पार्टी तयार जूगु खँय् न्ह्यथंगु दु ।
सिंहदरवारय् च्वंगु मधेशी जनअधिकार फोरमया संसदीय ज्याकूथी वनाः माओवादी नेतातय्सं लिखित पौ लःल्हासें थःपिंसं बहुदलीय प्रतिर्स्पधा स्वीकार यायेधुंकूगुलिं बहुदलवाद थंज्याःगु दार्शनिक खँग्वःयात संविधानय् न्ह्यथने मफइगु खँ धाःगु दु । अथेहे न्हूगु संविधान जारी याये न्ह्यः हे कार्यतालिका दयेकाः लडाकु समायोजन यायेत माओवादीं सहमति प्वंकूगु दु । तर समायोजन जुइपिं लडाकुतय् ल्याः धाःसा इमिगु इच्छाय् निर्भर जुइगु खँ धाःगु दु ।
तराई-मधेश लोकतान्त्रिक पार्टी, मधेशी जनअधिकार फोरम (लोकतान्त्रिक), मधेशी जनअधिकार फोरम व सद्भावना पार्टी दुथ्याःगु मोर्चां थःपिनिगु १६बुँदे आधारपत्र न्ह्यब्वसें उकी सहमिति प्वंकीगु दलयात प्रधानमन्त्रीया निर्वाचनय् समर्थन यायेगु खँ धाःगु खः । माओवादीं थुकीया बारे लिखित लिसः बीवं मोर्चाया आन्तरिक बैठक च्वनाः आधिकारीक धारणा सार्वजनिक याइगु खँ धाःगु दु ।
लिखित लिसः लःल्हायेत माओवादी अध्यक्ष पुष्पकमल दाहाल 'प्रचण्ड' व उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश' फोरमया संसदीय दलया ज्याकूथी थ्यंकादीगु खः । उगु इलय् मोर्चा नाप आवद्ध प्यंगूलिं घटकया शीर्ष नेताय् ब्वति दुगु खः ।
