१७ गते न्हूम्ह प्रम ल्यइ : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' साउन १७ गते जुइगु स्वंगूगु चरणया निर्वाचनं न्हूम्ह प्रधानमन्त्री ल्यइगु दाबी यानादीगु दु । शनिवाः सभामुख सुवासचन्द्र नेम्वाङनापया खँल्हाबंला लिपा पत्रकारत नाप खँल्हाबंला यानादिसें वय्कलं १७ गतेया निर्वाचनय् थःगु पक्षय् बहुमत खाकेत कुतः जुयाच्वंगु धयादिसें थःगु नेतृत्वय् बहुमतीय आधारय् सरकार गठन जुसां शान्ति व संविधान निर्माण जुइगु धयादिल ।
पत्रकारत नाप खँल्हाबंला याये न्ह्यः सभामुख नेम्वाङनाप जूगु खँल्हाबंलाय् नं शान्ति प्रकृया व संविधान निर्माणया विषयलय् सहलह जूगु खः । खँल्हाबंलाय् दलत दथुइ जुयाच्वंगु मतभेदया कारणं शान्ति प्रकृया व संविधान च्वययेगु ज्या दिनाच्वंगु बारे ध्यानाकषर्ण यानादिसें नेम्वाङं याकनं दलत दथुइ खनेदुगु समस्या समाधान यानाः संविधान च्वयेगु ज्यायात न्ह्याकेत प्रचण्डयात इनाप यानादीगु खः ।
