सर्वोच्च पाखें खनालया उम्मेदवारी लितकाःगु विरुद्धया रिट खारेज

प्रधानमन्त्रीया निर्वाचनय् नेकपा (एमाले)या अध्यक्ष झलनाथ खनालया उम्मेदवारी लितकाःगु विरुद्ध दायर जूगु रिट सर्वोच्चं खारेज यानाब्यूगु दु । शुक्रवाः न्यायाधीश बलराम केसीया एकल इजलासं व्यवस्थापिका संसदया कार्यव्यवस्था नियमावलिया नियम ७(८) संविधाननाप बाझेजूगु मखंगूलिं अमान्य जुइमफइगु खँ न्ह्यथंगु दु । व्यवस्थापिका संसद दुने काम कारवाही संविधानया धारा १०७ (२) बमोजिम हस्तक्षेप याये मिलेमजूगु खँ नं आदेशय् न्ह्यथनातःगु दु ।

वंगु मंगलवाः कुमार आचार्य, भविश्वर गुरुङ, रमेशप्रसाद खनाल लगायत कानुन व्यवसायीतय्सं व्यवस्थापिका संसदय् साउन ५ गते जूगु निर्वाचनय् प्रस्ताव पेस जुइधुंकूगुलिं खनालया उम्मेदवारी लितकाये मदुगु धासें वय्कया उम्मेदवारी कायम हे यायेत माग यासें रिट दायर याःगु खः ।