सरकार-तामसालिङ दथुइ झिंगुंगू बुदेँ सहमति
संयुक्त तामसालिङ संघर्ष समिति व सरकार दथुइ तामङ समुदाय्या माग संबोधन यायेगु झिंगुंगू बुदेँ सहमति जूगु दु ।
सहमति लिपा संयुक्त संघर्ष समितिं स्वनिगः नापं स्वनिग नापसंया झिगू जिल्लाय् पूर्व घोषित बन्द लितकाःगु दु । अथेहे संघर्ष समितिं ग्वसाःग्वःयातःगु थीथी विरोद्धया ज्याझ्व नं लितकाःगु दु ।
शनिवाः बहनि शान्ति मन्त्रालय् निगू पुचः दथुइ जूगु वार्ताय् सरकारयापाखें शान्तिमन्त्री जनार्दन शर्मा प्रभाकरं ब्वति काःगु खसाः संघर्ष समितिया पाखें सूर्यमान डोङ्ग, वीरबहादुर लामा तामाङ, दिलमान पाखरिङ तामाङ, परशुराम तामाङ व कमानसिहं लामापिसं ब्वति कयादीगु खः ।
सहमतिइ उत्पीडित जाति, आदिवासी-जनजनति व थीथी क्षेत्र व वर्गया प्रतिनिधित्व याकाः तत्काल अन्तरिम संविधान बमोजिम राज्य पुर्नसंरचना आयोग गठन यायेगु सहमति जूगु दु । सरकार व संघर्ष समिति दथुइ राष्ट्रिय जनावर साया विषय पुर्नविचाः यायेत सहमति जूगु दु । संघर्ष समितिं सायात राष्ट्रिय जनावर देके मज्यूगु माग तःगु खः ।
अथेहे सरकारं सांस्कृतिक विभेदया अन्त्य यानाः दक्व जातजातिया संस्कृति स्थापित यायेगु व मान्यता बीत सम्बघ पक्ष नापाःया सहमतिइ साझा सांस्कृतिक नीति तय यायेगु सहमति जूगु दु । नापं सारकारं आदिवासी-जनजातिया ऐतिहासिक व सांस्कृतिया महत्व दुगु थासय् वःहे जातिया भाषाय् थीथी थाय्या नामाकरण यायेगु प्रतिबद्धता प्वंकूगु दु ।
नेपाली सेनाया बन्दोबस्ती गण 'पिपा गोश्वारा'य् तामाङ जातियात अपहेलना याइ कथंया संरचनाया अन्त्य यानाः नेपाली राष्ट्रिय सेनायात समावेशी देयेकीगु नीति प्रभावकारी रुपं कार्यान्वयन यायेमाःगु सहमति जूगु दु ।
अन्तराष्ट्रिय श्रम संगठन १६९ अभिसन्धिया भावन कथं खुसीलगायत प्राकृतिक स्रोत-साधनय् आदिवासी जनजाति व स्थानीयवासीया स्वामित्व कायम यायेत आवश्यक कानुन देयेका न्ह्याः वनेगु सहमति निगू पुचः दथुइ जूगु दु । सहमति कथं मां भासं शिक्षा बीगु ज्या प्रभावकरी रुपं कार्यान्वयन यायेत सरकारं आः न्हूगु बजेट अप्वयेकीगु जूगु दु ।
झिंगुंगू बुँदे सहमति कार्यान्वयन जू मजूगु अनुगमन यायेत छवाः दुने निगूिलं पक्ष दुथ्याःगु न्याम्ह दुजः दुगु समिति गठन याइगु जूगु दु ।
