चीधंगु वाम पार्टीतलिसे कांग्रेसया वार्ता
येँ (सन्ध्या टाइम्स)/वाम पार्टी माओवादीयात मत बी मते धकाः कांग्रेसं चिचीधंगु वाम पार्टीतय्त इनाप याःगु दु। संसदय् दुथ्याःगु चिचीधंगु वाम पार्टीतलिसे थौं जूगु नापलायेगु ज्याय् कांग्रेसं थ्व इनाप याःगु खः ।
कांग्रेसपाखें प्रधानमन्त्रीया उम्मेदवार जुयादीम्ह रामचन्द्र पौडेलं वइगु सोमवा संसदय् जुइगु प्रधानमन्त्रीया चुनावय् माओवादी अध्यक्ष प्रचण्डयात मत मबीगु लागिं थ्व चीधंगु वाम दलतय्त इनाप यानादीगु खः। माओवादी सत्ता कब्जा यायेगु खेलय् वनाच्वंगुलिं माओवादी उम्मेदवार प्रचण्डयात मत बी मजिउगु तर्क न्ह्यथँसें पौडेलं थ्व इनाप यानादीगु खः ।
नेपाली कांग्रेसं एमालेया मत मवयेकं थः उम्मेदवार मत्याइगु जुयाः वइगु १७ गते पौडेलयात मत बीत नं चीधंगु वाम दलतय्त इनाप याःगु खः। कांग्रेसया सिंहदरवारस्थित संसदीय दलया ज्याकुथी थौं सुथय् उगु बैठक च्वंगु खः।
तर बैठकय् दुथ्याःगु चीधंगु दलतय्सं थःपिं राष्ट्रिय सहमतिया हे सरकार गठन यायेमाः धइगु पक्षय् दुगु जुयाः प्रचण्ड जक मखु मेगु नं सुं नं पार्टीयात मत मबीगु खँ धाःगु दु। चीधंगु दलतय्सं आः निगुलिं पार्टीया उम्मेदवारतय्सं नां लित कयाः न्हूगु कथं सहमति दयेकाः वनेगु लागिं पहल यायेमाः धकाः प्रस्ताव तःगु खः। सदनय् एमाले व माओवादी बाहेक नं मेगु न्यागू वाम पार्टी दु ।
सदनय् चीधंगु वाम पार्टीतय् स्थिति
नेकपा (माले) ९
नेकपा (संयुक्त) ६
नेमकिपा ५
राष्ट्रिय जनमोर्चा ४
नेकपा (एकीकृत) २
थ्व फुक्क ल्याः छथाय् तयेबलय् २६ मत दु। एमालेया १०९ व माओवादीया २३७ मत दु।
