त्रिवि गेटय् ११ विद्यार्थी संगठनया धर्ना

येँ (सन्ध्या टाइम्स)/त्रिभूवन विश्वविद्यालयया मूल गेटय् हे थौं सुथंनिसें झिंछगू विद्यार्थी संगठनया विद्यार्थीत धर्ना च्वंगु दु। प्रमाणपत्र तहलय् तत्काल भर्ना कायेमाःगु माग यानाः आन्दोलन याना वयाच्वंगु झिंछगू विद्यार्थी संगठनतय्सं थ्व धर्ना बिउगु खः। त्रिविया मू लुखाय् हे धर्ना च्वनाच्वंपिं विद्यार्थीतय्सं नाराबाजी नं याःगु दु। विद्यार्थीत धर्ना च्वनाच्वंगुलिं त्रिविया कर्मचारी व प्राध्यापकत तकं दुने दुहां वने फयाच्वंगु मदु ।

विद्यार्थीतय्सं म्हिगः सनिलय् त्रिविया उपकुलपति, रेक्टर व रजिष्ट्रारयात न्याघौ तक थःपिनि नियन्त्रणय् काःगु खः। आन्दोलन याना वयाच्वंगु झिंछगू विद्यार्थी संगठनय् नेकपा (माले), नेमकिपा, राष्ट्रिय जनमोर्चा नापं थीथी दलनाप सतीगु विद्यार्थी संगठनत दुथ्याः। थुकी मूमू राजनीतिक दलत माओवादी, कांग्रेस व एमालेया विद्यार्थी संगठनत धाःसा दुथ्यानाच्वंगु मदु। थ्व स्वंगू दलया विद्यार्थी संगठनतय्सं आन्दोलनया दथुइ हे झंगः लानाः प्रविणता प्रमाणपत्र तह चीकूसां जिउ धकाः त्रिविलिसे सहमति याःगु द्वपं झिंछगू विद्यार्थी संगठनं बिउगु दु। छुं दिं न्ह्यः तक ततःधंगु स्वंगू विद्यार्थी संगठनया नेतृत्वय् थुगु आन्दोलन न्ह्यानाच्वंगु खःसा लिपा वयाः थ्व स्वंगू विद्यार्थी संगठनतय्सं त्रिविलिसे प्रविणता प्रमाणपत्र तह चीकूसां जिल धकाः सहमति यानाः आन्दोलन दिकाछ्वःगु खः ।