लियो क्लब अफ बालाजुया पदस्थापन
येँ (सन्ध्या टाइम्स)/लायन्स तया लियो क्लब अफ बालाजुया २७ क्वःगु पदस्थापन व न्हूगु लायन्स क्लब अफ बालाजु युथया उलेज्या विश्व शान्तिया कामना यासें लायन्स क्लब अन्तर्राष्ट्रिय, लायन्स डिष्ट्रिक ३२५ वि नेपालया गभर्नर लायन राजन लम्सालं यानादिल ।
नायः लायन सुरेन्द्ररत्न शाक्यया सभापति जूगु उगु ज्याझ्वलय् लायन मणिश्रीरत्न वज्राचार्यं लसकुस न्वचु बिसें लायन वर्ष २००९-१० लय् जूगु गतिविधिया प्रतिवेदन लःल्हानाः थःगु कार्यकालय् सुथांलाक न्ह्याकूगुलिं लायन्स अन्तर्राष्ट्रिय क्लबया पुलांम्ह नायः लायन राममान श्रेष्ठयात आउट स्टाय्ण्डिङ लियो एडभाइजर अवार्ड, छ्याञ्जे लायन दिनेश पौडलयात आउटस्टाय्न्डिङ सेक्रेटरी अवार्ड, लियो क्लबया नायः रोसना थापायात शतप्रतिशत प्रेशिडेन्ट अवार्ड, अर्लट सम्मान छसिकथं लायन मणिश्री रत्न वज्राचार्य, राममान श्रेष्ठ व सुरेन्द्ररत्न शाक्ययात बिउगु खः। अथेहे ईन्टरनेशनल युथ एक्सचेन्ज युथ अवार्ड लियो समेश विक्रम ध्वज जोशी, लियो सुदिप शाक्य व लियो विकेश श्रेष्ठयात बिउगु खः ।
ज्याझ्वःया निगूगु सत्रय् लायन वर्ष २००९-१० नेपाःया लायन्स इतिहासय् हे लियो क्लबया दुजःपिंसं ब्वति काःगु न्हूगु लायन्स क्लब अफ बालाजु युथ लायन्स अन्तर्राष्ट्रियस दर्ता जुइत ताःलाःगुलिं नायः लायन फरिदा श्रेष्ठयात चार्टर सर्टिफिकेट लःल्हाःगु खः ।
स्वंगूगु सत्रय् गभर्नर लायन राजन लम्सालं लायन्स, लियो व न्हूपिं दुजःपिंत सपथ ग्रहण व २७ क्वःगु पदस्थापन यानाः लायन्स वर्ष २०१०-११ यात विधिवत पदस्थापन यानागु घोषणा यानादिल। थ्वहे ज्याझ्वलय् न्हूपिं नायःपिंसं थःथःगु वार्षिक ज्याझ्वःत न्ह्यब्वयादिल।
लायन्स अन्तर्राष्ट्रियया नियम कथं बिना उद्घोषण संचालन जूगु उगु ज्याझ्वलय् थीथी ब्यक्तिपिंसं थःथःगु नुगःखँ तयादिल। निवर्तमान नायः लायन सुरेन्द्ररत्न शाक्यं सकसितं सुभाय् देछानादिल ।
