दर्शन सम्बन्धी गोष्ठी ज्याझ्वः
यल (सन्ध्या टाइम्स)/ बुद्ध धर्मकथं शान्तिनायक बुद्धं न्हापांखुसी धर्मचक्र प्रबर्तन यानाबिज्याःगु असारपुन्हि व हिन्दू धर्मकथं गुरुपुन्हि कुन्हु जीवन जगतयात भौतिकवादी दृष्टिं स्वयेगु वा चेतनाया दृष्टिं स्वयेगु धइगुबारे डा. चिन्तामणी गौतमं थःगु नुगःखँ प्वंकादिल।
ललितपुर नागरिक अभियानया संयोजक शाक्य सुरेनं बुद्ध धर्मं झीत थ्व संसार चेतना प्रमुख व भौतिक प्रमुख कथं स्वयेगु मयासे मध्यम मार्ग लीत प्रेरित यानाच्वंगु खँ तयादिल। चन्द्रबहादुर महर्जनं थ्व संसार मार्क्सवादी दृष्टिकोण कथं पदार्थयात प्रधानता बियाः वनेमाःगु खँ कुलादिल ।
सोकागाकाईया प्रतिनिधि भद्रा राना मगःनं सोकागाकाईया सद्धर्म पुण्डरिक सूत्रया महत्वबारे उलादिल। पद्म श्रेष्ठं हिन्दू धइगु धर्म मखु सभ्यता खः धइगु अर्थय् थम्हं 'नेपाल' नांगु धर्म सफू च्वयागु खँ कनादिल ।
सदस्य अभय शर्मा, कवि क्याफेया संयोजक राजेश बज्राचार्य व थीथी बिज्ञपिंसं नेपाः थीथी दर्शनया उत्पति स्थल खः, झीसं विश्वयात दर्शनया ज्ञान बी फयेमाः धइगु खँय् बः बियादिल ।
