माओवादी स्वंगू, कांग्रेस, एमाले व फोरम छगू-छगू थासय् त्यात
रोल्पाय् माओवादी त्यात
न्यागू जिल्लाया खुगू निर्वाचन क्षेत्रय् जूगु संविधानसभा उपनिर्वाचनया स्वंगू थासय् माओवादीं त्याकूगु दुसाः कांग्रेस, एमाले व फोरमं छगू छगू निर्वाचन क्षेत्रय् त्याकूगु दु । माओवादीं रोल्पा-२, कास्की-१ व काचनपुर-४य् त्याकूगु दु । अथेहे कांग्रेसं मोरङ-७य्, एमालें धनुषा-५ व फोरमं मोरङ-५य् त्याकूगु दु ।
रोल्पा क्षेत्र नम्बर २या उपनिर्वाचनय् माओवादीया उम्मेदवार सन्तोष बुढामगरं १९९३३मत त्याकादीगु खः । अथेहे वयेकया निकटम प्रतिद्वन्द्वी नेकपा एमालेया हरिप्रसाद घर्तीं ६१३२मत हःगु दु । नेपाली कांग्रेसया गंगाराम डांगिं ४७९१मत हःगु खः । प्रधानमन्त्री पुष्पकमल दाहालं राजीनामा बीवं थ्व क्षेत्रय् उपनिर्वाचन जूगु खः ।
धनुषा क्षेत्र नम्बर-५य् एमालेया उम्मेदवार रघुवीर महासेठ त्याःगु दु । महासेठं १३२३०मत त्याकादीगु खसाः वयेकया निकतम प्रपतद्वन्दी तराई मधेश लोकतान्त्रिक पार्टीया श्रीकृष्ण यादवं १२१८९मत हयादीगु खः । राष्ट्रपति रामवरण यादव त्याःगु थ्व निर्वाचन क्षेत्रय् राष्ट्रपतिया काय् चन्द्रमोहन यादव धासा ६०२९मत हयाः स्वंगूगु थासय् लाःगु दु ।
अथहे कास्की क्षेत्र नम्बर १या माओवादी उम्मेदवार कृष्ण गुरुङं नेपाली कांग्रेसया उम्मेदवार दीपक गुरुङ स्वयां स्वीनिगू अप्वः मत हयाः त्यानादीगु दु । कृष्णं १२२५७मत त्याकादीगु खसाः दीपकं १२२२५मत हयाःदीगु ख: । अथेहे एमालेया शालिमराम पौडेलं १११८मत हयादीगु खः ।
कास्कीया लेखनाथ नगरपालिका-१३या जनपाया चौतारोय् च्वंगु व्रम्हरुपा मावी केन्द्रया मेसिनं नेपाली कांग्रेसया शुन्य मत क्यनेवं अन विवाद जूगु खः । विवादया कारणं अन मतगणना निघौ तकःया निंतिं स्थगित जूगु खः । निर्वाचन आयोगया प्राविधिकतय्सं मेसिनं मखुगु खँ मक्यनीगु खँ कन्भिन्स याःगुलिं हाकनं मतगणना यायेत सहतम जूगु कास्की कांग्रेसया सभापति यज्ञबहादुर थापां धयादीगु दु ।
संविधानसभाया उपनिर्वाचनया मोरङ-७य् जूगु मतदानय् नेपाली कांग्रेसया डा. शेखर कोइराला त्यानादीगु दु । मोरड क्षेत्र नम्बर ५य् मधेशी जनअधिकार फोरमया उम्मेदवार जयराम यादव त्याःगु दुसाः काचापुर-४य् माओवादीया उम्मेदवार हरिश ठकुल्ला कमल क्षेत्री त्याःगु दु ।
मोरङ ७य् कोइरालां १२०६१ मत हयाः त्यानादीगु खः । वयेकय सतिम्ह प्रतिद्वन्दी फोरमया उम्मेदवार चुमनारायण तवदारं ११३९० मत त्याकूगु खसाः एकीकृत माओवादीया विजय थारु स्वंगू थासय् लाःगु दुसाः एमालेया विनोद ढकाल प्यंगुगू थासय् लाःगु दु । कोइराला संविधानसभाया निर्वाचनय् वहे क्षेत्रं मधेशी जन अधिकार फोरमया विजय गच्छेदा नाप पराजित जुयादीगु खः ।
मोरड-५य् यादवं १३८११ मत हयाः त्याःगु खसाः वयेकया प्रतिद्वन्दी एकीकृत माओवादीया शिवकुमार मण्डलं ८३३१मत, कांग्रेसया जगन्नाथ सिंहं ५५४४मत, तमलोपाया उमेस गिरीं २८०१मत हःगु खसाः एमालेया जिवन घिमिरें ३५७०मत हःगु खः । थ्व क्षेत्रं फोरम अध्यक्ष उपेन्द्र यादवं संविधान सभाय् त्याकादीगु खः ।
अथेहे कञ्चनपुर-४य् एकीकृत माओवादीया ठकुल्लां १०७८२मत हयाः विजय जुयादीगु खः । शनिवाः सुथय् प्यताः ईलय् घोषणा याःगु मतपरिणामय् ठकुल्लाया प्रतिद्वन्दी नेपाली कांग्रेसया यज्ञरान जोशीं ९९९४मत व एमालें ५५३९ मत हःगु खः । थ्व निर्वाचन क्षेत्रं ठकुल्ला शेरबहादुर देउवा नाप संविधान सभा निर्वाचनय् बूगु खः ।
