चार्ल्स शोभराज दोषी ठहर
थीथी अभियोगया द्वपं लानाच्वंम्ह प्रुान्सेली नागरिक चार्ल्स शोभराजयात सर्वोच्च अदालतं दोषी ठहर याःगु दु । शुक्रवाः सर्वोच्चं शोभराजयात सर्वस्व सहित जन्मकैद यायेगु यल पुनरावेदन अदालतया फैसलायात सदर याःगु दु । न्याधीशत रामकुमार प्रसाद साह व गौरी ढकालुया मंकाः इजलासं पुनरावेदन अदालतया फौसलायात सदर याःगु खः ।
अमेरिकी नागरिक कोन्निजो ब्रोनिचिजयात स्याःगु व मेमेगू अभियोग लानाच्वंम्ह शोभराज न्यादँ न्ह्यः निसें नेपाःया जेलय् कुनातःगु खः । ब्रोनिचिजया हत्याया अभियोगय् येँ जिल्ला अदालतं जन्मकैदया फैसला न्इंकूगु खःसा उकीयात पुनरावेदन अदालत यलं सदर याःगु खः । लिपा शोभराजं २०६२ सालय् सर्वोच्च मुद्दा दायर याःगु खः ।
थ्वहे दथुइ शोभराज विरुद्धया अभियोगयात सर्वोच्चं सदर यायेवं वय्कया जाहान निहिता विश्वासं उगु निर्णय प्रति आक्रोश प्वंकादीगु दु । निहीतां सर्वोच्चया निर्णययात भ्रष्ट न्यायाधीशतय् निर्णय धकाः टिप्पणी यानादीगु दु । अथेहे शोभराजया पक्षय् वकालत यानाच्वंपिं कानुन व्यवसायीतय्सं नं अदालतया निर्णयात उचित प्रमाण व सही मूल्यांकन मजूगु प्रतिक्रिया ब्यूगु दु ।
