थैवया हत्याया छानबीन यायेत माओवादी-एमालेया मंकाः कार्यदल

बुटवलय् हत्या जुम्ह युथफोर्सया कार्यकर्ता प्रचण्ड थैवया हत्याया छानबीन यायेत एकीकृत नेकपा (माओवादी)व एमालें खुगू पुचः दुथ्या:गु कार्यदल देकूगु दु । एमाले संविधान सभा दलया ज्याकू सिंहदरवारय् शनिवाः जूगु निगू दलया शीर्ष नेतातय् बैठकं कार्यदल गठन याःगु खः ।

बैठकं थैवया हत्या लगायत देय्या थीथी थासय् निगू दलत दथुइ जुयाच्वंगु ल्वापू व आक्रमणया घटनाया बारे छानबीन यायॆत कार्यदल देकूगु खः । एमालें अध्यक्ष झलनाथ खनालं २४घण्टा दुने कार्यदलं प्रारम्भिक विवरण लःल्हाइगु खँ कनादिल ।

कार्यदलय् माओवादीयापाखें नारायणकाजी श्रेष्ठ, दिनानाथ शर्मा व पोष्टबहादुर बोगटी दुथ्याःगु दुसाः एमालेया पाखें अशोक राई, राजेन्द्र पाण्डे व शंकर पोखरेल दु ।