१७ गते तटस्थ च्वनी मखु: यादव
येँ (सन्ध्या टाइम्स)/मधेशी जनअधिकार फोरमया नायः उपेन्द्र यादवं आः वइगु साउन १७ गते जुइगु प्रधानमन्त्रीया चुनावय् मधेशवादी मोर्चा तटस्थ मच्वनीगु खँ धयादीगु दु ।
थौं रिपोर्टर्स क्लबं ग्वसाः ग्वःगु छगू ज्याझ्वलय् न्ववासें वय्कलं थ्व खँ धयादीगु खः। फोरम नं मधेशी मोर्चाया छगू घटक खः। आः तक एकीकृत माओवादी व कांग्रेस मध्ये सुयात भोट बीगु धकाः मोर्चां छुं निर्णय याःगु मदुनि। अथे खःसां नं थःपिंसं तयागु फुक्क मधेश छगू स्वायत्त प्रदेश नापं थःथपिनि मेमेगु सर्तत सुनां पालना यायेगु धकाः प्रतिबद्धता प्वंकी थःपिनि भोट नं वयात हे वनीगु खँ मोर्चां धायेगु याना वयागु दु। अध्यक्ष यादवं यदि थःपिनिगु सर्त एकीकृत माओवादी व नेपाली कांग्रेस निगुलिं पार्टीं स्वीकार मयात धाःसा मधेशवादी दलतय्सं वहे मुद्दायात ज्वनाः मंका आन्दोलन यायेगु जुइ धकाः नं वय्कलं ख्याच्वः बियादीगु दु ।
