'राष्ट्रिय सहमति सरकारया विकल्प मदु'
येँ (सन्ध्या टाइम्स)/एकीकृत नेकपा (माओवादी) या वरिष्ठ उपाध्यक्ष डा. बाबुराम भट्टरार्इं आःया अवस्थाय् नं राष्ट्रिय सहमतिया विकल्प मदुनि धयादीगु दु। थौं सुथय् नेपाःया नितिं बेलायती राजदूत एन्ड्रिउ हलनाप खँल्हाबल्हा यासें वय्कलं थ्व खँ धयादीगु खः ।
उपाध्यक्ष डा. भट्टराईं बहुमतीय सरकारं शान्ति व संविधानया एजेण्डा पूरा याये मफइगु जूगुलिं राष्ट्रिय सहमतिया सरकार माःगु खँ उल्लेख यानादीगु खः। वय्कलं साउन १७ गते प्रधानमन्त्रीया बहुमतीय प्रणाली कथं चुनाव जुइ न्ह्यः हे राष्ट्रिय सहमतिया सरकार दयेकेत कुतः यायेगु जुइ धासें माओवादी, कांग्रेस, एमाले व मधेशवादी दलतनापं राजनीतिक शक्तित दुथ्याःगु राष्ट्रिय सहमतिया सरकारं जक संविधान दयेके फइगु नापं शान्ति प्रक्रियायात निर्ष्कषय् थ्यंके फइ धकाः नं वय्कलं धयादिल। वय्कलं धयादिल, 'फयां फत्तले १७ गतेया दुने हे सैद्धान्तिक सहमति यानाः वनेगु कुतः जुइ। मखुसा १७ गते लिपा मेगु प्रक्रियाकथं नं राष्ट्रिय सहमतिइ संयुक्त सरकारदयेकेगु नितिं सहमति ब्वलंकेगु
जुइ ।'
वय्कलं संविधानसभा, गणतन्त्र, क्रान्तिकारी भूमिसुधार नापं मेमेगु एजेण्डाय् सुनवाई मजूगुलिं हे माओवादीं झिदँ ताःहाकःगु जनयुद्ध न्ह्याकागु खः धासें शान्तिपूर्ण विधिपाखें थ्व एजेण्डा पूरा यायेत माओवादी आः तक नं संघर्षय् हे दनि धकाः नं धयादिल ।
