न्हापांम्ह मिसा ज्योतिषया सफू
येँ (सन्ध्या टाइम्स)/नेपाःया न्हापांम्ह मिसा ज्योतिष रति जोशी श्रेष्ठया च्वसां पिदंगु "ज्योतिष /वास्तु परामर्श सेवा सदन" नांगु सफूया चिखिफ्यनेज्या म्हीग छगू बःचाधंगु ज्याझ्वलय् जुल ।
ज्याझ्वः ज्योतिष परामर्श सेवाया अध्यक्ष लोकराज पौड्यालया सभापतित्वय् जूगु खःसा मूपाहां कथं पञ्चाङ्ग निर्णायक मण्डलया अध्यक्ष माधवप्रसाद भट्टराई झाःगु खः ।
मूपाहां भट्टराईं सफूया निंतिं च्वमि मय्जुयात सुभाय् देछासें पुलांगु सफूया अध्ययन यानाः न्हून्हूगु प्रविधियात छ्यलाः धिसिलाक्क ज्योतिष ख्यल्य पलाः न्ह्याकेत सुझाव बियादिल। च्वमि श्रेष्ठया अबु सूर्यबहादुर जोशीं थः म्ह्याचं थ्व ख्यलय् धिसिलाक्क पलाः न्ह्याके फयेमा धासें ९० सालया हस्तलिखित सफूत लःल्हानादिल।
चिखिफ्यना ज्याझ्वलय् गणेश गौतम, लक्ष्मी बराल, मंगलराज प्रधानाङ्ग, विजयनाथ गौतम लगायतया वक्तातय्सं च्वमि श्रेष्ठयात अझ धिसिलाक पलाः न्ह्याके फयेमा धकाः भिंतुना बियादिल ।
नुगःखँ प्वंकुसें च्वमि श्रेष्ठं थःगु सेवायात नेपालय् जक सीमित मयासे विदेशय् तकं थ्यंकेगु खँ कनादिल।
सभापति लोकराज पौड्यालं मिसापिंत दमन यायेगु सुरुवात मुस्मांतय् शासन लिपा जूगु खँ न्ह्यथँसें झीगु संस्कारय् मातृ देवो भवः धायेधुंकाः तिनि पितृ देवो भवः वइगु खँ कनादिल। वय्कलं मय्जु श्रेष्ठया थ्व पहल लिपा मेमेपिं नं मिसापिंत ज्योतिषशास्त्रय् पलाः न्ह्याकेत हःपाः प्राप्त जुइगु बिचाः नं प्वंकादिल। मय्जु रति जोशी श्रेष्ठं नेपालभाषां नं आपालं साहित्यिक रचनात च्वयादीगु दु ।
